Улсын хэмжээнд Эрүүгийн хуулийн тусгай ангийн 17.3 дугаар зүйлд заасан Залилах гэмт хэрэг 2020 онд 6205, 2021 онд 7968, 2022 онд 14914 хэрэг тус тус бүртгэгдсэн байна.
Улсын хэмжээнд Залилах төрлийн гэмт хэрэг 2022 оны 01 сарын байдлаар 862 хэрэг, 2023 оны 01 сарын байдлаар 1029 бүртгэгдсэн байна.
Эрүүгийн хуулийн тусгай ангийн 17.3 дугаар зүйл "Залилах" гэмт хэргийн гаралт жилээс жилд нэмэгдэж байна.
Залилах гэмт хэргийг үйлдэж байгаа үйлдлийн нэг аргийг "Койн" болгон ашиглаж байна.
Койноор бараа материал худалдаж авч болно, Койн худалдан авч, хөрөнгө оруулалт хийх юм бол их хэмжээний мөнгө олох боломжтой гэх мэтээр Койн гэдэг нэрийг ашиглаж мөнгө олох боломжтой гэж итгүүлэн "Залилах" гэмт хэргийг үйлдэж байна гэдгийг иргэд та бүхэн анхаарна уу?
Сүхбаатар дүүргийн цагдаагийн газрын нэгдүгээр хэлтсийн Мөрдөн байцаах тасгаас сэрэмжлүүлж байна.
Амлалт амархан байх тусмаа эрсдэл дагуулдаг гэдгийг анхаарна уу.
2022 оны байдлаар Улсын хэмжээнд гадаад улсад зорчих виз гаргуулахаар бусдад мөнгө өгч залилуулсан гэх гэмт хэргийн шинжтэй гомдол, мэдээлэл цагдаагийн байгууллагад 250 ирүүлсэнийг хүлээн авч бүртгэн мөрдөн шалгах ажиллагааг явуулсан байна. Энэхүү 2022 онд бүртгэгдсэн гадаад улсад зорчих виз гаргуулахаар бусдад мөнгө өгч залилуулсан хэргүүдийн 70 хувийг буюу 175 хэргийг илрүүлэн шүүхэд шилжүүлэх саналтай прокурорын хяналтанд хүргүүлж ажилласан байна. Харин үлдсэн 30 хувийг буюу 75 хэргийн мөрдөн шалгах ажиллагаа үргэлжлэн явагдаж байна. Эдгээр гэмт хэргүүдийн үйлдсэн этгээдийг мөрдөн шалгах ажиллагааны явцад хэн болохыг нь олж тогтоосон боловч дээрх этгээдүүд МУ-ын хилээр гарсан, эсхүл гадаад улсы нутаг дэвсгэрээс цахим хэрэгсэл ашиглан үйлдсэн байдгаас шалтгаалж ОУ-ын гэрээ болон Харилцан эрх зүйн туслалцаа үзүүлэх гэрээний дагуу гадаад улсад тодорхой төрлийн мөрдөн шалгах ажиллагаа явуулах, тухайн этгээдийн байгаа газрыг олж тогтоох шаардлагатай байдаг болохоор мөрдөн шалгах ажиллагаа удааширалтай байдаг юм. Зарим тохиолдолд тухайн этгээдүүд гадаад хараар буюу гадаад улсад оршин суух зөвшөөрлийнхөө хугацааг сунгуулаагүй буюу бидний хэлж заншсанаар хараар амьдардаг учраас тэдгээрийн байгаа газрыг олж тогтооход хүндрэлтэй байдаг болохоор бас тухайн хэргийг шийдвэрлэхэд хүндрэл учирдаг юм. Гадаад улсаас үйлдсэн энэ төрлийн хэргийн хувьд гэвэл цахим хэрэгсэл ашиглаж үйлдсэн, алсын зайнаас буюу цахим хэрэгсэлээр холбогдож үйлдсэн, мөн залилагч этгээдүүд иргэдээс мөнгийг интернет банк ашиглан гадаад улс руу шилжүүлэн авсан байдгаас шалтгаалан мөн хэргийг илрүүлэхэд хүндрэл учирдаг ч цагдаагийн байгууллагаас зүгээс хэн болохыг тогтоон ажиллагааг үргэжлүүлэн явуулдаг байна.
Иймд иргэд та бүхэн гадаад улсын виз мэдүүлэхдээ тухайн улсаас Монгол Улсад суугаа ЭСЯ-нд хандан материалаа өгч байх, эсхүл тухайн ЭСЯ-нд бүртгэлтэй, албан ёсны эрх олгосон аж ахуй нэгж байгууллагаар дамжуулан хандаж байхыг цагдаагийн байгууллагаас анхааруулж байна. Учир нь гадаад улсад зорчих визийг зөвхөн тухайн улсын ЭСЯ-аас олгодог гэдгийг анхаарах хэрэгтэй.
2022 онд хонжвор, сугалаа гэх нэршлийн дор иргэдийг хуурч, зохиомол байдлыг зориудаар бий болгож, бусдыг төөрөгдөлд оруулан залилсан гэх гэмт хэргийн шинжтэй үйлдлийн талаар цагдаагийн байгууллагаад иргэдээс 14 гомдол, мэдээлэл ирүүлсэнийг хүлээн авч мөрдөн шалгах ажиллагааг явуулсан байна.
Сүүлийн жилүүдэд олны танил хүмүүс олон нийтийн цахим сүлжээгээр дамжуулан тээврийн хэрэгсэл, хурдан удмын адуу, орон сууцны хонжвортой сугалаа явуулж байна хэмээн иргэдээс их хэмжээний мөнгө татан төвлөрүүлж байгаа үйлдэл нилээдгүй явагдаж байна.
Монгол Улсад эд, мөнгөний хонжворт сугалаа эрхлэх нь аж ахуй үйл ажиллагааны тусгай зөвшөөрлийн хуулиар зохицуулагддаг, өндөр шаардлага, шалгууртай, тодорхой болзол, шалгуур хангасан аж ахуй нэгжид зөвшөөрөл олгогдсоны үндсэн дээр эрхлэх үйл ажиллагаа ба зөвшөөрлийг зөвхөн аж ахуйн нэгж буюу хуулийн этгээдэд Сангийн яамнаас зөвшөөрөл олгосны дагуу эрхлэх ёстой. Түүнээс дурын хувь хүн, иргэнд энэ төрлийн үйл ажиллагаа явуулах зөвшөөрөл олгогдохгүй. Гэтэл цахим орчинд энэ төрлийн үйл ажиллагааг хэн дуртай нь явуулж байгаа нь өөрөө хууль бус ажиллагаа юм.
"Аж ахуйн үйл ажиллагааны тусгай зөвшөөрлийн тухай хууль" гэж бий энэ хуулиар Монгол Улсад явуулахыг хориглосон үйл ажиллагааг зааж өгсөн байдаг, мөн зарим төрлийн үйл ажиллагааг эрх бүхий байгууллагаас олгосон тусгай зөвшөөрлийн дагуу явуулах ёстой байдаг. Тэгвэл энэ хуулийн 15.4.4 хэсэгт "Эд мөнгөний хонжворт сугалаа явуулах" хэмээн тодорхой заасан байгаа. Тэгэхээр хуулийн хүрээнд бол дурын нэг иргэн фэйсбүүк, сошиал орчинг ашиглаж сугалаа явуулах боломжгүй. Өөрөөр хэлбэл дээрх иргэд хууль зөрчиж байна гэсэн үг юм. Үүнээс гадна хонжворт сугалаа гэдэг нь тодорхой нарийн шалгууртай. Энэ төрлийн үйл ажиллагаа явуулахын тулд Сангийн яамнаас зөвшөөрөл авсан байх шаардлагатай.
Иргэд та бүхэн сугалаанд оролцохдоо болгоомжтой хандахыг цагдаагийн байгууллагаас анхааруулж байна.
